約伯7章
默想：心中若有痛苦，會通發洩情緒嗎？對誰發洩？怎樣發洩呢？抑是約束嘴、呣免講出來？
祈禱：我的上帝啊！我心中講不出的吐氣，無人通講。只有祢真正瞭解我的感受，我欲親像約伯誠實給你講我的憂苦，免得我厭恨家己的生命，免得我講出傷害別人的話。
約伯8章
默想：比勒達用「因果論」由果推因，就能解釋所有災難的原因嗎？對遭受苦難的人，咱可以輕易地指出是因犯罪才受苦嗎？
祈禱：上帝啊！我相信祢對佇不義的確有公正的審判。但是對佇祢奇妙偉大的作為，我實在所知有限。求祢互我有智慧看出祢榮光的作為；求祢賜我有同情心，卡多陪伴受苦的人，行出黑暗的路。
約伯9章
默想：我是完全正直、無通指責的義人嗎？上帝怎樣判斷我的「自義」呢？
祈禱：上帝，求祢赦免阮的過失。當阮受苦的時，阮一時呣知影原因，就真容易掠家己做義，認為「家己完全正確，不應該遭受患難。」求主賜我閣卡多的耐性，去聽受苦的人心中的忿忿不平、或是懷疑，幫助度過艱苦及失志。
約伯10章
默想：上帝造阮的目的，就是欲互阮受苦、欲毀滅阮嗎？
祈禱：「萬事互相效力，互疼上帝的人得著利益。」願阮佇苦難中間，無失去對上帝的信靠、希望及疼痛；會通堅持信念，脫出撒但趁機會所設「絕望」的羅網。
約伯11章
默想：瑣法直接用「你…」來攻擊約伯，指正約伯。對於患憂鬱症的親友，我可以直接用「你…」來指正伊嗎？
祈禱：豈采阮對一再重複發生的事失去了耐性，也求主賜阮有夠額的「同理心」，了解當事者的苦痛，才進一步用「面質」來幫助伊脫出「牛角尖」。
約伯12章
默想：第一回合，約伯的3個朋友所講的話，對受苦的約伯有幫助嗎？佇人群中，豈會找到苦難的解答嗎？
祈禱：完全無罪的主耶穌基督，祢受苦釘死是欲洗除人的罪，就阮脫離不義、重新及上帝和好。主耶穌祢的一生，就是苦難的答案。發生佇阮身上的苦難，呣若鍛鍊阮的心志愈堅定，更加會做別人的利益。
約伯13章
默想：為什麼約伯講伊3個朋友是「無路用的醫生」？
祈禱：雖然阮知聖經的真理，求聖神互阮謹慎運用，免得錯誤解釋、過頭論斷別人所受的苦境。阮無自高欲做「醫生」，只有求聖神大權能安慰受苦的人，賜下「生之勇氣」！
